LU CAVADDU
C'era un cavaddu di beddi fattizzi
baiu di pilatura, e avìa un gran passu
era l'invidia pri li soi biddizzi,
e quann'iddu niscìa facìa fracassu.
Lu so' patruni ci facìa carizzi,
lu vulìa beni, e l'avìa fattu grassu
ma 'ntrà lu megghiu di li valintizzi
nna coscia si spizzau 'ntra un malu passu.
D'iddu ogni musca si 'mpussessa allura,
ogni sceccu chiù vili lu rimpetta,
ricivi cauci, e muzzicuna ogn'ura.
Cui lu stimava, la sua morti aspetta.
O quantu ddu pruverbiu m'innamura
all'arvulu cadutu accetta, accetta.
Giuseppe Marraffino
Nessun commento:
Posta un commento