VASAMI
Ma chi ti costa darimi un vasuni?
chi mi voi farimi moriri dannatu?
Chianci stu cori c'un senti raggiuni
e pari un picciriddu ammizzagghiatu.
Bedda, si voi, mi mettu addinucchiuni
comu avanti a Gesù Sacramintatu:
Ju chiudu l'occhi e tu cu ssu vasuni
ti cogghi l'arma, lu cori e lu ciatu!
Giuseppe Denaro
MAVARIA RICIPRUCA
Di lu jardinu miu siti ciurera,
siti la Santa e lu me cori è vara!
Ju sugnu l'asta e vui la me bannera,
siti di l'occhi mei li pinnulara.
Vui suli, e st'arma mia cilesti sfera,
ju sugnu magu e vui siti mavara:
si' ammagarati st'arma mia sincera,
ju v'ammagaru e poi... semu a la para.
Giuseppe Denaro
Nessun commento:
Posta un commento