QUATTRU PETRI
Sutta un merlettu bianco
di mennuli ciuruti
cci stanu quattru petri
pusati ppi signali:
Signali d'una vita,
ca fu scintilla e poi
caluri senza fini
di cinniri, chi cuva.
Lassa pusari, zittu,
lu petalu d'un ciuri...
fermati furmicula!...
e Tu, ferma lu cori!...
lu senti stu rumuri?...
è prùvuli, chi cadi
d'u Tempiu di Giununi:
Un cocciu cadi uora,
un cocciu fra cent'anni.
Pi mia, la petra è viva,
appuntu picchì muori!
Nn'àju vistu petri o' munnu,
palummi senza l'ali,
signari: puntu e basta!
ad omini putenti;
ma petri comu chista
su' vivi e fannu figghi
e i figghi fannu figghi;
nun si nni vannu mai!
La terra cuncipisci
un Geniu comu chistu
e pi 'na vita 'u teni
'nta lu so' ventri 'i matri;
e poi lu partorisci!
Un gridu di duluri:
è mortu Pirandellu!
.................................
e Pirandellu è natu!
I mennuli su' ciuri,
su' ciuri 'i matrimoniu,
lu Geniu spusa l'arti;
i figghi, i personaggi
di tutti li cummedi
abbrazzanu lu Patri
e currunu p'u munnu!...
Nun vi ricordu i Templi,
e mancu i Cattedrali,
e li teatri antichi,
cunchìgghi 'nmenzu 'u mari,
cu perli di paroli;
nun dicu: guarda l'Etna!
ma sulu quattru petri!
Oh, Valli di li Templi,
Tu scordati li Templi,
Tu scordati lu mari,
Tu scordati li ciuri,
e ghisali sti petri,
comu si fussi manu
e mostrali a lu munnu
e grida cu lu ventu:
Chistu è Sicilianu!
Renzino Barbera
Nessun commento:
Posta un commento