'O ddu nuvembri, 'ntà Sicilia 'ill'anni '50, di dopumanciari 'nzinu a calata ddo' suli, 'o cimiteru si videvunu fimmineddi ccu 'ntà sacchetta ddò fadali 'u ghòmmaru 'i lana filata, 'ntà 'na manu 'i ferri ppa' quasetta e 'ntà l'autra 'u ferlizzu.
Chi è 'u ferlizzu? 'Na siggitedda, comu un banchittu fattu di trunca di ferla, 'dda pianta leggia e capaci chi nasci ppi natura 'nté nostri muntagni e in primavera ciurisci jàuta ccu' ciuffi di culura gialli.
Ccu 'sti ferlizzi in manu i fimmini jevunu 'o campusantu, dopu manciari; s'assittavunu vicinu 'a fossa di so' murticeddi e si mittevunu a travagghiari 'a quasetta. Stavanu dda', ci tinevunu cumpagnia 'e morti e... cci parravunu... (ca i morti parrunu 'e vivi quannu ssù vuluti beni; e ppi chistu, 'na fimmina affiziunata nun havi a trascurari e c'havi a teniri cumpagnia".
Nessun commento:
Posta un commento