ORTIGIA
Ortigia, vita mia, naca d'amuri,
splinnenti sutta 'n suli di zicchinu
scugghiera 'ntrà lu mari, ssì 'n jardinu
c'abbunna 'n tia 'a zagara e li ciuri.
Ppi lu straneru ssì 'na meravigghia
ppi la ducizza di li to' jurnati,
macari quann'é 'nvernu pari 'stati
ppi chistu nudda terra t'assumigghia.
Cu parti ci ritorna a primavera,
quannu fragranti sbocciunu li ciuri
quannu ogni passareddu fa l'amuri
quannu la to' biddizza in tuttu impera.
Ma ogni figghiuzzu to' di pena mori
quann'é custrittu stari a' stranìa
vivi senz'alma, cu la nustalgia
cu 'ngruppu e cu duluri 'n cori.
Neli Seguino
Nessun commento:
Posta un commento