CURTIGGHIARISMU di Vito Marino

CURTIGGHIARISIMU 1927

Ciddi...ciddi...cummari, a stu mumentu
mi pigghiaru 'na bedda puddastruna!..
Ci desi a tutti quattru lu frummentu,
si lu manciaru e mi nni manca una! -
- Sti latrunazzi... e qual'è ca vi manca?
- La cchiù grossa, cummari, chidda janca!
- V'addunasturu bona, San Giuvanni,
sutta lu lettu? dintra lu cufinu?..
- Gnursì, m'haju addunatu a tutti banni...
nenti, mi la rubaru cca vicinu,
cummaruzza bedda,
nun s'arràssunu mai di la vanedda.
Siddu si l'agghiutteva lu tirrenu,
beddamatri, cchiù tempu ci vulìa!...
Pesti cci ha fari, càncuru e vilenu
a cui si mancia la jaddina mia...
ci ha veniri 'na granni malanova,
e Gesù Cristu mi nn'ha dari prova.
Lu Signuri sta grazia mi l'ha fari:
quanti pinni tinìa la me' jaddina
tanti mali strapunti cci ha mannari
supra la so vitazza ogni matina!
A sta sira curcatu 'nta lu lettu,
dumani a jornu 'nta lu catalettu.
Quantu frumentu avìa la me' jaddina
intra la vozza, stàiu ccu la spranza
ca tanti mbuddi arreri la carina
cci hanu a nàsciri, e tanti 'nta la panza!
Chi a dòrmiri, accussì, la vidi brutta
s'è misu a faccia all'aria o a facci sutta.
Cci addisiduru mali supra mali...
Stortu peju d'un manicu di mola,
sempri malatu dintra lu spitali,
l'hanu a vutari dintra li linzola,
e li dutturi, pi lu so pirculu
s'hanu a sdingari a taliallu sulu.
- Ma n'è giustu pi 'na puddastredda
mannati ssi jastimi, cummaruzza!
- Vih! quant'è asciutta me cummari Nedda!
La me jaddina pareva 'na nuzza!
Era du' chili in pernu, lu sapiti?
E vui frattantu parrati e diciti!
Ju parru e sfogu la me' vucca amara!
Annunca moru s'iddu m'incutugnu!...
Si mi diciunu in caso, curtigghiara,
nun mi nni fazzu pirchì nun ci sugnu.
A nuddu toccu a lu cunchiurimentu...
mi pari ca ju parru e ju mi sentu.
Quannu nun fazzu nomu di la genti,
nessunu mi po' fari eccezzioni...
Dapoi si c'è qualcunu ca si senti
ci pozzu dari soddisfazioni!
Sugnu bona a liggiricci la storia
di tutta la so rrera rriritoria.
- Oh donna Rusalia ccu cui l'aviti?
Calati l'occhi! ... troppu hata guardatu!
- Pirchì si nun li calu, chi faciti?...
Cci mannati lu sceccu carzaratu?
- Trasitivinni, e nun parrati cchiui,
ca ccu l'haju nun 'lha diri a vui!
Lu vostru nomu cu l'ha muntuatu?
Ju parru sula ... pirchì vi sintiti?
Dapoi s'aviti carbuni vagnatu!
- Oh nun sbagghiati, fitusa ca siti!
ca carbuni vagnatu nun n'avemu,
e la genti cu' semu nni sapemu!
Già di darivi cuntu mi virgognu,
però nun vogghiu ca guardati cchiui!
Ca la genti nun avemu di bisognu
'na fracita jaddina comu a vui!
- Ju fracita?! Si vui, tutta sdingusa,
sempri accattati lattuchi e linusa!...
Ca va! nun mi faciti scatasciari
ca ni sapemu li beddi e li larii...
Basta mi vogghiu mettiri a cantari,
a la facciazza di li strafallarii:
Ju cantu li sturneddi e nun mi frenu
la me' jaddina v'ha fari vilenu!...

Vito Marino (1880-1955)