'NTO' VARBERI - Santo Grasso

‘Nta lu varberi

Avanti chè primu, dici lu varberi
a li clienti misi ad aspittari.
Iu! Dissi ‘nvecchiu, c’hera furasteri,
avissi ‘a varvicedda di rasari.

E ddocu lu varberi a modu sò,
lu vicchiareddu fici accumudari,
lestu nni lu punzeddu ci sputò
e poi ‘ncuminciò a ‘nsapunari.

Lu vecchiu grida! – Vui siti stunatu!
Ma d’accussì trattati li cristiani?
Chi modi megghiu ‘i chistu ‘un ci nni sunu?

– Mi manca l’acqua e... siti furtunatu
in quantu furasteri, a li paisani
ci sputu nni la facci e poi ‘nsapunu.