'A SALINA di Sebastiano Giuga

‘A SALINA

Sutta ‘n suli a mmenz’Austu
quagghia ‘u sali nta la salina
l’omini ‘u cògghinu cu la pala.

Fanu tanti picculi munzedda
‘u portunu a spadda chî cufina
ammassannulu ntâ casa salina.

Brilla comu tanti diamanti
sutta ‘n suli liuni e cucenti
priziusu a tavula pâ ggenti.

Movinu l’ali mi fanu rricriari
l‘aqua si tinci ca pari ‘na fata
chî pinni dî Fenicottiri rosa.

Mentri ‘a luna cu la facci bedda
mmenzu a l’acqua fa scintiddi
sutta ‘n cielu ch’è cinu di stiddi.

Sebastiano Giuga