SCECCHI E PICIRIDDI DIU L'AIUTA
Va' la to' varca cu lu ventu 'n puppa
e l'affari ti vanu a veli aperti,
siddu li materazzi l'hai di stuppa
ppi tia la stuppa in pinni si cunverti.
Pri lu pettini to' nun ci su' gruppa,
pri tia lu munnu è paru; e ti diverti
a dannu di li babbi e di li sperti,
s'hai purtusa la sorti ti li 'ntuppa!
Mi rassumigghi a un certu picciriddu
ca na vota cascò d'un campanaru
e friscu si susìu comu 'n ariddu.
Tu nun sì statu mai di menti acuta.
ma lu sparu ppi tia diventa paru:
"scecchi e picciriddi Diu l'ajuta!"
Agatino Perrotta
Nessun commento:
Posta un commento