sabato 22 febbraio 2014

CUNTU SICILIANU

Lu Re e li carzarati

'Na vota nu Re di Sicilia jiu a visitari nu carziri chinu di carzarati, tutti ccu cunnanni di vint'anni, trent'anni o ppi tutta 'a vita e tutti si misunu in riga aspitannu 'u Re.
Quannu lu Re cci fu davanti, spijò a lu primu:
- Tu pirchì si' cca' cunnannatu? Chi facisti?
- Ju, Maistà? Ju sugnu 'nnuccenti; mi pigghiaru mentri era a la mè casa.
- E tu? - dici a lu secunnu -
- Ju sugnu 'nnuccenti. Quannu mi pigghiaru era curcatu.
- E tu? - dici a lu terzu.
- Io sugnu 'mputatu d'aviri ammazzatu a unu; ma foru tutti calunnii, e soffru ppi nenti.
'Nsumma a quanti dumannau lu Re, tutti si desunu 'nnuccenti. L'urtimu cci dissi:
- Maistà, ju haju arrubbatu, haju ammazzatu, haju statu nu scilliratu, e ppi chissu mi cunnannaru 'a vita.
Comu lu Re 'ntisi accussì, si vota e cci dici: 
- E mentri è chissu, tu, gran birbantuni, nesci di 'mmenzu di galantomini, ca su' tutti 'nnuccenti, e 'un ponnu stari ccu tia ca li guasti. -
- Lu pigghia e lu fa nèsciri a libbirtà, e accussì la virità fu primiata.

Nessun commento: