sabato 8 febbraio 2014

CCHIU' SI CAMPA E CCHIU' SI SAPI cuntu di Giuseppe Pitré


Cchiù si campa e cchiù si sapi
di Giuseppe Pitré

Si cunta e s'arricunta ca cc'era un vecchiu stravècchiu, omu di 'spirienza, assittatu a lu focu.
Veni un picciutteddu; e ci dici: - M''u dati un còcciu di luci, pp'addumari lu cufuni nni mia? -
- Eh figghiu(dici lu vecchiu), ju ti lu dugnu, ma 'nta chi tu  metti, ca nun purtasti nenti? nun 'u sa' ca lu focu abbrùcia?
 - E vu' chi nn'ati a fari?(dici lu picciutteddu); datimillu, ca cci penzu ju.
- 'Nca pigghiatillu. - fa lu vecchiu.  Lu picciutteddu allura chi fa? si jinchi la chianta di la manu di cìnniri fridda, cci metti supra un còcciu di focu e si nni va.
- Oh! (dici lu vecchiu; dannusi 'na manata 'n testa); e ju ccu tutta la mè 'spirienza e tant'anni chi campu, nun sapia affattivu sta cosa;
Cchiù si campa e cchiù si sapi.-
E di ddocu, sta palora arristau pri muttu.
Larga 'a foglia stritta 'a via vuautri diciti 'a vostra ca haju dittu 'a mia

Nessun commento: